Մոսկվայում կայացած ԼՂ բանակցություններն առաջընթաց չեն գրանցել

Մոսկվայում կայացած ԼՂ բանակցություններն առաջընթաց չեն գրանցել

Հոդվածի առանցքում

  • Հայաստանի և Ադրբեջանի արտգործնախարարները համաձայնել են շարունակել ղարաբաղյան հակամարտության կարգավորմանն ուղղված ջանքերը, սակայն Մոսկվայում կայացած հանդիպումից հետո ակնհայտ առաջընթաց չի նկատվել: Ապրիլի 15-ին Զոհրաբ Մնացականյանի և Էլմար Մամեդյարովի բանակցություններին մասնակցում էր Ռուսաստանի արտգործնախարար Սերգեյ Լավրովը և ԵԱՀԿ ՄԽ համանախագահները, որոնք առաջնորդում են ձգձգված վեճը կարգավորելուն ուղղված դիվանագիտական ջանքը:

Ուշադրությանն արժանի

 

Հայաստանի և Ադրբեջանի արտգործնախարարները համաձայնել են շարունակել ղարաբաղյան հակամարտության կարգավորմանն ուղղված ջանքերը, սակայն Մոսկվայում կայացած հանդիպումից հետո ակնհայտ առաջընթաց չի նկատվել:

Ապրիլի 15-ին Զոհրաբ Մնացականյանի և Էլմար Մամեդյարովի բանակցություններին մասնակցում էր Ռուսաստանի արտգործնախարար Սերգեյ Լավրովը և ԵԱՀԿ ՄԽ համանախագահները, որոնք առաջնորդում են ձգձգված վեճը կարգավորելուն ուղղված դիվանագիտական ջանքը:

Մնացականյանն ու Մամեդյարովը «վերահաստատել են կողմերի մտադրությունը` շարունակելու ղարաբաղյան հակամարտությունը քաղաքական և դիվանագիտական միջոցներով կարգավորելու ուղղությամբ ջանքերը», – ասվում է ԵԱՀԿ կայքում հրապարակված հայտարարության մեջ:

Նախարարները «շեշտեցին իրենց շահագրգռվածությունը կոնֆլիկտային գոտում իրավիճակի հետագա կայունացմանը, մասնավորապես, գյուղատնտեսական գործունեության ընթացքում», – նշված է հայտարարության մեջ՝ ակնհայտորեն նկատի ունենալով գարնանացանի շրջանն ու, հնարավոր է, նաև ավելի ուշ՝ բերքահավաքի շրջանը:

Վերջին ամիսներին ԼՂ շուրջ և հայ-ադրբեջանական սահմանին հրադադարի ռեժիմի խախտումների զգալի անկում է արձանագրվել:

1994-իզինադադարի համաձայնագրից հետո ԼՂ-ն վերահսկում են հայկական ուժերը: Բաքուն պնդում է, որ նաև ՀՀ բանակը: Ոչ մի երկիր չի ճանաչել ԼՂ անկախությունը:

Մոսկվայում կայացած բանակցություններում կողմերը պայմանավորվել են միջոցներ ձեռնարկել թույլ տալու երկու կողմերի ձերբակալված անձանց հարազատներին այցլել նրանց:

Նշվեց, որ Մնացականյանն ու Մամեդյարովը «պատրաստակամություն են հայտնել սկսել կոնկրետ աշխատանք` մարդկանց միջև շփումների հաստատման ուղղությամբ», այդ թվում լրագրողների փոխադարձ այցելությունների միջոցով, և կողմերը համաձայնել են «շարունակել իրենց շփումները առաջիկայում»:

Մարտի 29-ին Վիեննայում Հայաստանի վարչապետ Նիկոլ Փաշինյանը և Ադրբեջանի նախագահ Իլհամ Ալիևը առաջին անգամ հանդիպեցին պաշտոնապես՝ Մինսկի խմբի հովանու ներքո:

Երևանը եւ Բաքուն բանակցությունները որակել են «դրական» և «կառուցողական», ասելով, որ կողմերը պայմանավորվել են հակամարտության գոտում պահպանել հրադադարի ռեժիմը և շարունակել երկխոսությունը:

Հայաստանում ԱՄՆ արտակարգ և լիազոր դեսպան Լին Թրեյսին լավատեսորեն է տրամադրված խաղաղ գործընթացի հարցում: Ապրիլի 15-ին «Ազատություն» ռադիոկայանին նա ասել է, որ վերջին մի քանի ամսվա ընթացքում եղել են «շատ դրական զարգացումներ»:

«Վարչապետ Փաշինյանի և նախագահ Ալիևի միջև մի քանի շփումներ են եղել, դրանք դրական և կառուցողական են եղել: Մենք տեսել ենք շփման գծում բռնությունների նվազում: Դա, կարծում եմ, իսկապես օգտակար երկխոսություն և շփում է: Մենք կցանկանայինք, որ առաջնորդներն այսպես շարունակեն»,- ասել է դեսպանը:

Մարտի գագաթնաժողովը վեց ամիսների ընթացքում չորրորդ դեմառդեմ հանդիպումն էր Ալիևի և Փաշինյանի միջև: Նախկինում ընդդիմադիր պատգամավոր Փաշինյանը 2018-ի մայիսին է դարձել Հայաստանի վարչապետ՝ բողոքի ցույցերի ֆոնին, որոնց արդյունքում նրա նախորդը հրաժարական ներկայացրեց:

Հոդվածի բնօրինակն՝ այստեղ

 

Write a comment