Շառլ Ազնավուրը` ֆրանսիացի երգող աստղը մահացավ 94 տարեկանում

Շառլ Ազնավուրը` ֆրանսիացի երգող աստղը մահացավ 94 տարեկանում

Հոդվածի առանցքում

  • Ֆրանսիացի երգիչ, երգերի հեղինակ Շառլ Ազնավուրը մահացավ 94 տարեկանում` հետևում թողնելով երգչի ավելի քան 80 տարվա կարիերա: Ազնավուրն ամուսնացած է եղել երեք անգամ, ունի 6 զավակ:

Ուշադրությանն արժանի

Աստղը մահացավ Ֆրանսիայի հարավ-արևելքում գտնվող իր տներից մեկում:

Հայ ներգաղթյալների ընտանիքում ծնված արտիստը վաճառել է ավելի քան 180 միլիոն ձայնագրություն, նկարահանվել ավելի քան 60 ֆիլմերում: Նրան մեծ ճանաչում բերեց «She» երգը:

2017-ին Հոլիվուդյան փառքի ճեմուղիում բացվեց նրա անվան աստղը: Դեռևս 1998-ին CNN-ը նրան անվանեց դարի արտիստ:

Երգիչը ծնվել է 1924թ-ին Փարիզում, հայի ընտանիքում, նրա ծնողները ցեղասպանությունից փախել էին Ֆրանսիայի մայրաքաղաք` նոր կյանք սկսելու ակնկալիքով:

Ազնավուրի հեղինակած երգերի հիմքում գաղթական ընտանիքի զրկանքներն են ու սեփական փորձը:  

Երգիչը պատրաստվում էր համերգային շրջագայության Ֆրանսիայում և Շվեյցարիայում: Շրջագայության մեկնարկը տրվելու էր այս տարվա նոյեմբերին, բաղկացած էր 7 համերգից:

Նա վերջերս էր վերադարձել Ճապոնիայից: Ձեռքի կոտրվածքի պատճառով ստիպված էր չեղարկել ամառը նախատեսված համերգները:

Ազնավուրը ձայնագրել է ավելի քան 1200 երգ՝ 7 լեզուներով: Դրանք ներկայացվել են աշխարհի 94 երկրներում:

Համասեռամոլություն, ամուսնություն ու տղամարդու զգացմունքների բացահայտում.  Ֆրանսիայի Ֆրենկ Սինատրա անունը ստացած Ազնավուրի երգերը նաև տաբու համարվող թեմաներով էին: 1973 –ին գրած «What Makes a Man» հիթը տրանսվեստիտ համասեռամոլի մասին էր:

90-ամյա երգչի համերգները շարունակում էին մարդաշատ լինել, նա շարունակում էր երգել իր կյանքի մասին, ծագումով շվեդ իր կնոջ մասին, որի հետ նշում էր ամուսնության 50-ամյա հոբելյանը:

Նա հաջողակ էր և’ որպես երգիչ, և’ որպես դերասան: 1960թ.-ին էկրան բարձրացավ «Shoot the Piano Player» («Սպանել դաշնակահարին») ֆիլմը, որտեղ Շառլը գլխավոր դերում էր:

Օսկարակիր «The Tin Drum» («Թիթեղյա թմբուկը») ֆիլմում Շառլը խաղալիք վաճառող հրեայի դերում էր:

Նախագահ Էմանուել Մակրոնն Ազնավուրի մեծ երկրպագուն է: Նրա դասընկերները պատմում են, որ կարաոկե-երեկույթների ընթացքում նախագահը հաճախ էր երգում Ազնավուրի երգերը:

Ազնավուրը ակտիվ բարեգործական գործունեություն էր ծավալում. 1988-ին Հայաստանում ավերիչ երկրաշարժից հետո, իր ընկերոջ` Լևոն Սայանի հետ հիմնեց բարեգործական հիմնադրամ:

2009-ին նշանակվել է Շվեյցարիայում Հայաստանի դեսպան, Ժնևում Միավորված Ազգերի Կազմակերպության պատվիրակն էր:

Երգչուհի Պետուլա Կլարկը BBC-ի հետ զրույցում խոստովանել է . «Նա հիասքանչ մարդ էր, շատ զվարճալի: Նա վարպետ էր, բեմի վրա նրան տեսնելը յուրահատուկ բան էր»:

«Ազնավուրը կհիշվի իր երգերով: Նա հիպնոսացնում էր: Կհիշեմ նրան որպես լավագույն ընկեր ու լավագույն արտիստ»:

Աշխարհի հազարավոր երկրպագուներ հարգանքի տուրք են մատուցում թվիթերյան իրենց էջերում:

«Good Morning Britain»-ի հաղորդավար Պիրս Մորգանը գրում է.«Կհիշեմ նրան որպես խելացի, պերճախոս և հմայիչ մարդու»:

Երաժիշտ Ռիչարդ Քոուլը գրել է. « Ազնավուրը Սինատրայից ավելի լավ երգիչ է»:

BBC 6 Music-ի Ժիլ Պետերսոնն էլ կիսվել է Ազնավուրի կատարմամբ իր ամենասիրելի երգով` «Hier Encore…»

Հոդվածի բնօրինակն՝ այստեղ:

Write a comment