Բրյուսելում կայացել է ԵՄ-ՀՀ «Մարդու իրավունքների երկխոսության» 10-րդ փուլը 

Հոդվածի առանցքում

• Ապրիլի 8-ին Բրյուսելում կայացավ Եվրամիության և Հայաստանի միջև «Մարդու իրավունքների երկխոսություն» թեմայով քննարկումների 10-րդ փուլը: ԵՄ-ն և Հայաստանը պատրաստակամություն են հայտնել շարունակել Համապարփակ և ընդլայնված գործընկերության համաձայնագրի (CEPA) իրականացումը: Հայաստանում վերջին ընտրություններից հետո քաղաքացիների ակնկալիքները ժողովրդավարության ամրապնդման և օրենքի գերակայության, կոռուպցիայի դեմ պայքարի և մարդու իրավունքների պաշտպանության հարցում բարձր են

Ուշադրությանն արժանի

• Ինչո՞ւ պետք է ԼՂ հակամարտության դիվանագիտական կարգավորումը լինի ԱՄՆ-ի առաջնահերթությունը
• Կանաչ տեխնոլոգիաների ոլորտը զարգանում է հայկական փոքր ձեռնարկությունների շրջանում
• Բարոյական ուժով Գերմանիան հայկական կոտորածները ցեղասպանություն ճանաչեց, հերթն ԱՄՆ-ինն է

Ապրիլի 8-ին Բրյուսելում կայացավ Եվրամիության և Հայաստանի միջև «Մարդու իրավունքների երկխոսություն» թեմայով քննարկումների 10-րդ փուլը:

ԵՄ-ն և Հայաստանը պատրաստակամություն են հայտնել շարունակել Համապարփակ և ընդլայնված գործընկերության համաձայնագրի (CEPA) իրականացումը: Հայաստանում վերջին ընտրություններից հետո քաղաքացիների ակնկալիքները ժողովրդավարության ամրապնդման և օրենքի գերակայության, կոռուպցիայի դեմ պայքարի և մարդու իրավունքների պաշտպանության հարցում բարձր են: CEPA-ն պարտավորեցնում է ԵՄ-ին և Հայաստանին ամրապնդել հիմնարար ազատությունները:

Հանդիպման ընթացքում ԵՄ-ն և Հայաստանը քննարկել են ժողովների և խոսքի ազատությունը, ընտրական բարեփոխումները, գենդերային հավասարությունը, դատական և քրեակատարողական բարեփոխումները, ինչպես նաև աշխատանքային իրավունքները: Լրատվամիջոցների հետ կապված օրենսդրության հետագա փոփոխությունները կապահովեն ավելի թափանցիկություն և բազմակարծություն:

Հայաստանը հաստատեց իր պատրաստակամությունը արդարադատության ոլորտում բարեփոխումների մասով, մասնավորապես, օրենքի առաջ հավասարության սկզբունքի, անկախ դատական համակարգի և ստուգումների և հավասարակշռության արդյունավետ մեխանիզմների հացրում: Անչափ կարևոր է, որ Հայաստանը միջազգային չափանիշներին համապատասխան համընդգրկուն օրենք ընդունի խտրականության դեմ և Մարդու իրավունքների պաշտպանի գրասենյակին կից ստեղծի ազգային իրավահավասարության մարմին: Մարդու իրավունքների պաշտպանը և նրա գրասենյակը դրական քայլեր են ձեռնարկել շուրջօրյա և արագ արձագանքման թիմեր ստեղծելու հարցում:

ԵՄ-ն և Հայաստանը քննարկել են 2019-2023թթ. Գենդերային հավասարության ազգային ռազմավարության նախագծի նախապատրաստումը: Երկուստեք կարևորվել է հասարակության իրազեկվածության բարձրացումը և գենդերային հավասարության խթանումը, հատկապես կրթության միջոցով:

Հայաստանի իշխանությունների և Խոշտանգումների և անմարդկային, արժանապատվությունը նվաստացնող վերաբերմունքի կանխարգելման եվրոպական կոմիտեի (CPT) միջև սերտ համագործակցություն կլինի: Հայաստանում պետք է շարունակական լինի կարողությունների զարգացումը, որպեսզի հոգեբուժական հաստատություններն ու ոստիկանությունը, քրեակատարողական հիմնարկները և անչափահասների ինստիտուտները ավելի լավ վերահսկվեն և գնահատվեն:

Իր քաղաքականության շրջանակում ԵՄ-ն հանդիպել և խորհրդակցել է հայ և միջազգային քաղհասարակության ներկայացուցիչների հետ՝ նախքան մարդու իրավունքների թեմայով երկխոսությունը, որը հանգեցրել է գործնական եզրակացությունների՝ հստակ գործողություններ կլինեն հաջորդ տարի:

Հայկական պատվիրակությունը գլխավորում էր արտաքին գործերի նախարարի տեղակալ Ավետ Ադոնցը, իսկ Եվրամիության պատվիրակությունը ղեկավարում էր Արևելյան գործընկերության երկրների հետ երկկողմ հարաբերությունների բաժնի ղեկավար Ռիչարդ Թիբելսը: Հանդիպմանը ներկա էին նաև Մարդու իրավունքների պաշտպան Արման Թաթոյանը և Եվրոպական արտաքին գործերի ծառայության գենդերային հարցերով գլխավոր խորհրդական Մարա Մարինակին:

Հոդվածի բնօրինակն՝ այստեղ