Էրդողան. Թուրքիան մտադիր է Ռուսաստանի հետ համատեղ արտադրել Ս400-ներ

Հոդվածի առանցքում

• Թուրքիայի նախագահ Ռեջեփ Թայիփ Էրդողանը հայտարարել է, որ ռուսական ՀՕՊ համակարգերը Թուրքիայում ամբողջությամբ կտեղակայվեն 2020-ի ապրիլին՝ հակառակ ԱՄՆ-ից պատժամիջոցների սպառնալիքին՝ հավելելով, որ հաջորդ քայլը կլինի Մոսկվայի հետ համատեղ Ս400-ների արտադրությունը:

Ուշադրությանն արժանի

• Չինաստանը կոչ է անում Թուրքիային աջակցել ույղուր զինյալների դեմ պայքարին
• Բուլղարիան նոր պատ է բարձրացնում, սակայն այս մեկը մարդկանց հեռու պահելու համար
• Տաջիկստանի և Ղրղզստանի միջև զինված բախումները չեն դադարում

 

Թուրքիայի նախագահ Ռեջեփ Թայիփ Էրդողանը հայտարարել է, որ ռուսական ՀՕՊ համակարգերը Թուրքիայում ամբողջությամբ կտեղակայվեն 2020-ի ապրիլին՝ հակառակ ԱՄՆ-ից պատժամիջոցների սպառնալիքին՝ հավելելով, որ հաջորդ քայլը կլինի Մոսկվայի հետ համատեղ Ս400-ների արտադրությունը:

Ռուսական արտադրության Ս400 համակարգերի առաջին մարտկոցը Թուրքիա է առաքվել վերջին օրերին և դա չկանխեցին նույնիսկ Միացյալ Նահանգներից կրկնվող կոչերը՝ համաձայնագիրը չեղարկելու մասին: Հակառակ դեպքում ԱՄՆ սպառնում է պատժել:

«Մենք սկսել ենք ստանալ մեր Ս400-ները: Ասում էին, թե մենք չենք կարող գնել դրանք: Աստծո օգնությամբ դրանք կտեղակայվեն իրենց համար նախատեսված վայրերում մինչև 2020-ի ապրիլ»,- ասել է Էրդողանը երեք տարի առաջ տեղի ունեցած հեղաշրջման փորձի ձախողման առիթով միջոցառմանը:

«Ս400-ներն ամենաուժեղ պաշտպանական համակարգն են նրանց դեմ, ովքեր կցանկանան հարձակվել  մեր երկրի վրա: Հիմա մեր նպատակն է Ռուսաստանի հետ դրանց արտադրությունը դարձնել համատեղ: Մենք կանենք դա», – ասել է նա:

ԱՄՆ սպառնացել է, որ Թուրքիան կբախվի պատժամիջոցների և արդեն սկսել է Անկարային Ֆ35 կործանիչների ծրագրից հեռացնելու գործընթացը: Վաշինգտոնը հայտարարել է, որ ռուսական ՀՕՊ համակարգերը սպառնալիք են Ֆ35-երի համար և Թուրքիան չի կարող ունենալ դրանք երկուսն էլ:

Թուրքիայի  նախագահն ավելի վաղ հայտարարել էր, որ չի հավատում, թե Վաշինգտոնը պատժամիջոցներ կսահմանի, քանի որ երկու երկրները ռազմավարական դաշնակիցներ են:

Հստակ չէ երբ և որտեղ վերջնականապես կտեղակավեն Ս400 համակարգերը, բայց Թուրքիան կլինի ՆԱՏՕ-ի առաջին անդամը, որը կգործարկի ռուսական համակարգ, որը կարող է խոցել թիրախներ մինչև 400 կմ հեռավորությամբ:

Ս400-ների պահեստամասերով բեռնված 9-րդ ռուսական օդանավն է վայրէջք կատարել Անկարային  մոտ գտնվող Մուրթեդ ռազմաբազայում, հայտարարել է Թուրքիայի ՊՆ-ն:

Նախկինում Աքինջի անունով այս ռազմաբազան անվանափոխվել է 2016-ի հուլիսի 15-ին տեղի ունեցած հեղաշրջման փորձից հետո: Աքինջին ռազմական հեղաշրջման փորձի կազմակերպիչների շտաբն էր:

Հեղաշրջման փորձից երեք տարի անց Էրդողանի համար դժվար ժամանակներ են: Նա կանգնած է թուլացող տնտեսության, ՆԱՏՕ-ի և ԱՄՆ-ի հետ վատթարացող հարաբերությունների, Ստամբուլի վերջին ընտրություններում պարտության առաջ:

2016-ի հուլիսի 15-ին ավելի քան 250  մարդ սպանվեց, 2000-ը վիրավորվեց, Էրդողանի կոչից հետո հազարավորները դուրս եկան փողոցներ՝ դիմադրելու ըմբոստությանը:

Արևմուտքի հետ հարաբերությունները բարդանում են նաև հեղաշրջման փորձի պատճառով, քանի որ թուրք պաշտոնյաները Արևմուտքին մեղադրում էին Անկարային բավարար աջակցություն չցուցաբերելու մեջ:

Այդ ժամանակից ի վեր Էրդողանը մոտեցել է Ռուսաստանի նախագահ Վլադիմիր Պուտինին՝ մտահոգությունների տեղիք տալով Եվրոպայում և ԱՄՆ-ում:

Հոդվածի բնօրինակն՝ այստեղ