Անտեսելով ռուսական մտահոգությունը՝ Բոլթոնն ասում է, որ միջուկային զենքի պայմանագիրը փրկելու ոչ մի միջոց չկա

Հոդվածի առանցքում

• Եվրոպական առաջնորդները չեն վիճարկել ռուսական խաբեության մասին ԱՄՆ պնդումները, սակայն անհանգստացած են, որ պայմանագիրը վերացնելու Թրամփի ծրագիրը կհանգեցնի միջուկային նոր մրցավազքի:

Ուշադրությանն արժանի

• Ջորջ Քլունիի ակտիվությունը, գումարած «Ժոզեֆինը և ես»
• Սառը պատերազմի ծայրահեղականությունն ու ճգնաժամերը
• Վրաստանի նախագահը մեղադրում է Ռուսաստանին ցույցեր հրահրելու մեջ

Ազգային անվտանգության հարցերով խորհրդական Ջոն Բոլթոնը երեքշաբթի ասել է, թե հնարավոր չի, որ Թրամփի վարչակազմը  հրաժարվի միջուկային զենքի համաձայնագրից դուրս գալու որոշումից,  չնայած որ անմիջականորեն նախագահ Վլադիմիր Պուտինից է լսել խնդրի վերաբերյալ Ռուսաստանի մտահոգությունների մասին:

Պուտինի հետ 90-րոպեանոց հանդիպումից հետո Բոլթոնը նորից կրկնել է ԱՄՆ մեղադրանքները, որ Ռուսաստանը խախտում է պայմանագիրը և Կրեմլին համոզելու փորձերը համարել է ժամանակի վատնում: Բոլթոնը համոզված է, որ պայմանագիրն ուժը կորցրել է:

«Կա ռազմավարական նոր իրողություն», – ասել է Բոլթոնը: «Սա սառը պատերազմի բալիստիկ հրթիռների մասին երկկողմանի պայմանագիր է` բազմաբևեռ բալիստիկ հրթիռների աշխարհում»:

Բոլթոնի հետ հարցազրույցում  Մոսկվայի թղթակիցը հարցրել է, թե ինչ պետք է անի Ռուսաստանը, որպեսզի ԱՄՆ-ն վերանայի որոշումը: Նա ասել է, որ եթե Չինաստանն ու Ռուսաստանը հրաժարվեն իրենց միջին հեռահարության հրթիռներից, նախագահ Դոնալդ Թրամփը երկու անգամ կմտածի իր որոշման մասին:

«Եթե Ռուսաստանն ապամոնտաժի պայմանագրով խախտած բոլոր սարքավորումները և Չինաստանն էլ նույնն անի, դա արդեն ուրիշ վիճակ կստեղծի: Կարծում եմ, որ դա չի լինի», – ասել է Բոլթոնը «Կոմերսանտին»:

Ռուսաստանը հերքել է այն պնդումները, թե խախտում է պայմանագիրը:

Երեքշաբթի Վլադիմիր Պուտինն իր մտահոգությունը հայտնեց ԱՄՆ-ի հայտարարությանը: Վկայակոչելով Միացյալ Նահանգների Մեծ կնիքը/զինանշան/, որի վրա ճաղատ արծիվը մի  ճիրանում 13 աղեղ է պահում, մյուսում՝ 13 ձիթապտղով ճյուղ, Պուտինը կատակել է, թե ԱՄՆ-ում, կարծես թե, միայն նետեր են մնացել:

Ըստ Associated Press- ի և այլ լրատվամիջոցների,  Պուտինը Մոսկվայում կայացած հանդիպման ժամանակ Բոլթոնին հարցրել է. «Ես մի հարց ունեմ: Ձեր արծիվը բոլոր ձիթապտուղները հավաքել է, մնացել են միայն նետե՞րը»:

Պուտինի խոսնակ Դմիտրի Պեսկովն ավելի լուրջ է վերաբերվել հարցի քննարկմանը, ասելով, որ ԱՄՆ դիրքորոշումը «ռիսկային էր» և ափսոսում է, որ ջանք չի գործադրվում նոր պայմանագրի մշակման համար:

«Խափանել պայմանագիրն այն դեպքում, երբ նույնիսկ նորի կնքման մասին ոչ մի ակնարկ չկա, դա մենք չենք ողջունում», – ասել է Պեսկովը, ըստ ռուսական «ТАСС» լրատվական գործակալության:

«Այսօրվա դրությամբ նոր փաստաթուղթ ստեղծելու հեռանկարներ չկան», – ասել է նա: «Սկզբից հրաժարվել պայմանագրից, հետո քննարկել նորի կնքման հիպոթետիկ հնարավորությունը, շատ ռիսկային դիրքորոշում է»:

Խոսքը գնում է 1987 թ.-ին Ռոնալդ Ռեյգանի և Խորհրդային Միության նախագահ Միխայիլ Գորբաչովի կողմից ստորագրված պայմանագրին: Այն ԱՄՆ-ից և Ռուսաստանից պահանջում էր ոչնչացնել 310 և 3,400 մղոն հեռավորության բալիստիկ և թևավոր հրթիռները, ինչպես նաև օժանդակ սարքավորումները:

Բոլթոնը մերժել է ենթադրությունները, թե պայմանագրից ԱՄՆ-ի դուրս գալը միջուկային նոր սպառազինությունների պատճառ կդառնա: Նա շրջանցել է այն հարցերը, որոնք վերաբերում էին Եվրոպայում կամ այլուր հրթիռներ տեղակայելու Թրամփի վարչակազմի մտադրությանը:

«Կարծում եմ, որ մենք շատ հեռու ենք նման հարցերի վերաբերյալ ցանկացած որոշումից», – ասել է Բոլթոնը: Նա նշել է, որ պայմանագիրը պարտադիր էր միայն ԱՄՆ-ի և Ռուսաստանի համար և քանի որ Ռուսաստանն այն խախտում է, ըստ Բոլթոնի «Միացյալ Նահանգներն է սահմանափակվում այդ պայմանագրով»:

Միևնույն ժամանակ, Բոլթոնն ասել է, որ Չինաստանը, Հյուսիսային Կորեան և Իրանը «ազատ անում են այն, ինչ ուզում են» և  միջին հեռահարության հրթիռների զարգացման հարցում «զգալի հաջողությունների են հասել»:

Եվրոպական առաջնորդները չեն վիճարկել ռուսական խաբեության մասին ԱՄՆ պնդումները: Սակայն նրանք անհանգստացած են, որ պայմանագիրը վերացնելու Թրամփի ծրագիրը կհանգեցնի նոր միջուկային սպառազինության:

Պայմանագիրը «նպաստել է սառը պատերազմի ավարտին և 30 տարի առաջ ուժի մեջ մտնելով այն դարձել էր եվրոպական անվտանգության հենասյունը», – ասվում է ԵՄ հայտարարության մեջ: Նշվել է, որ պայմանագրով միջուկային և սովորական մարտագլխիկներով մոտ 3000 հրթիռ է ոչնչացվել և կոչ է արել ԱՄՆ – ին ու Ռուսաստանին լուծել համաձայնագրի հարցում իրենց տարաձայնությունները:

«Աշխարհը նոր սպառազինությունների մրցավազքի կարիք չունի, որը ոչ ոքի չի օգնի,  ընդհակառակը, կհանգեցնի ավելի մեծ անկայունության», – ասվում է ԵՄ հայտարարության մեջ:

Թրամփը, հավանաբար, երկուշաբթի փորձեց ցրել այդ մտավախությունը, երբ խոստացավ Ռուսաստանի և Չինաստանի իր իսկ նկարագրած աճող սպառնալիքին պատասխանել, ստեղծելով Ամերիկայի միջուկային զինանոց:

«Մինչև մարդիկ ուշքի կգան, մենք այն կկառուցենք», – ասել է Թրամփը` նշելով ԱՄՆ միջուկային զենքի հզորությունը, – «Մենք ավելի շատ գումար ունենք, քան մեկ ուրիշը»:

Հոդվածի բնօրինակն՝ այստեղ: